秋官效應加上加息陰影，個股市散散哋，不過八方班股友冇個驚，排住隊入滙豐不特止，重話吼住中銀，一跌破十四個半就飛身撲去入貨。點解咁勇？佢哋話為咗九月選舉，阿爺一定會撐住香港個經濟喎，所以肯定有幾個月安全期。
八方都係中銀小股東，但自劉金寶「回國」之後，同中銀嘅人都冇乜來往。前兩日收到新年報，又做得幾好，用中國古代的天文地動儀器做主題，印咗啲「日晷」、「水運儀象台」、「渾天儀」、「候風地動儀」同「司南」（即指南針）圖片，重有埋解釋。大人睇完，可以用嚟教小朋友。
年報中仍有提及劉金寶呢位前總裁，話佢有一七三點五二萬股嘅認股權，行使價八元半。呢筆股權，以現市價計，值一千零六十七萬元。不過，劉總恐怕冇乜機會用到呢筆錢。
傳真︰2623-9278
電郵︰