由許鞍華執導嘅電影《玉觀音》，日前無聲無息喺香港上咗畫，得五間戲院有得睇，首日票房只得七千幾蚊。有人話係因為冇宣傳先冇人睇，亦有人又話係因為主角謝霆鋒同趙薇𠵱家人氣唔掂所致。前晚許鞍華去咗香港電台接受訪問，佢好平心靜氣咁話因為套戲係藝術片，所以對票房一啲都唔失望，但係可能佢做得電台訪問少，唔知有啲粗俗說話唔可以出街，連講兩次仆街，主持李思維㩒都㩒唔住，唔知有冇收到投訴？
許鞍華起初話：「套戲有五間戲院上，之前《荊軻刺秦王》都係得兩間戲院上，《千言萬語》得十二間，票房都係二萬蚊，呢啲係藝術片嚟，而且套戲一路未定幾時上，演員去晒做其他嘢，陳凱歌唔肯放霆鋒個期，趙薇又去咗希臘影相，都做唔到宣傳。」後來許鞍華喺電台話：「套戲唔係外間講到咁仆街。」主持聽到即刻好緊張咁幫佢兜番話：「意思即係唔係咁差嘛。」但係許鞍華好似真係唔知唔講得，之後又話：「《天地英雄》喺內地都收二、三千萬票房啦，都唔係一部咁仆街嘅戲。」
許鞍華一再爆粗，主持都唔知點算，惟有再講多句：「即係唔係咁差嘅電影。」個主持都知道許鞍華冇心，所以都冇辦法。
早前有報道指2R兩姊妹Rosanne同Race成日爭衫着，但係噚日佢兩個出席商台活動時，就不停否認，重說：「我哋使乜爭啫，啲衫一人一包pack好畀我哋，我哋絕對冇不和。」不過咁，兩姊妹成日出席咁多活動，啲衫唔夠着都唔出奇，交換着吓又有乜所謂呀！
霍震霆噚日去荃灣出席運動比賽做主禮嘉賓，有報道話佢二公子霍啟山同章子怡喺日前嘅LV派對上跳舞撻着，問佢知唔知？佢笑住否認話：「我諗係錯覺啫，佢哋只係跳舞，我作為父親嘅都唔知，至於我贊唔贊成個仔同明星拍拖？仔大仔世界，有佢自己生活同空間啦。」
蔣怡噚日同周汶錡一齊去到屯門，為「婚紗博覽2004」活動擔任模特兒，雖然蔣怡同周汶錡都係靚女，但噚日就絕對係蔣怡搶晒鏡，事關蔣怡噚日着嗰啲婚紗同晚裝唔係咁啱身，有啲鬆鬆哋嘅現象，每次佢出場，啲衫都係離晒罩，露出胸圍帶，咁走光法，唔搶鏡就奇啦！
沈嘉偉個老婆邱淑貞𠵱家已經懷孕五個月，但前幾日佢就撇低老婆，去咗中環蒲吧，凌晨十二點幾，佢一個人喺中環嘅酒吧Fly行出嚟，跟住揸車走人，點知轉頭又載住個女仔返酒吧繼續玩，今次就蒲足成粒鐘，但走嘅時候，佢就載埋五個朋友一齊走，違例超載，冇撞到交通警都算佢好彩。
陳法蓉近日喺雲南麗江拍劇集，佢話第一次去海拔高達三千幾米嘅地方，好在平時有做開運動，所以都適應，佢話喺內地拍戲令佢有三大得益，除咗可以遊覽當地名勝外，又可以賺錢，亦會增加佢知名度，𠵱家有七個廣告傾緊，問佢荷包係咪腫脹不少，佢笑住話：「咁收入同付出係成正比嘅。」
苗金鳳噚日出席喺西灣河電影資料館舉行嘅「小說．戲劇．文藝片」活動，現場重播苗金鳳主演嘅電影《一水隔天涯》，苗金鳳話：「呢部係我第一套拍嘅彩色電影，喺六十年代上映過之後，就冇再上過，連電視都冇做過㗎，好開心𠵱家可以再重播。」咁珍貴，唔知會唔會出番碟等影迷欣賞吓呢？
