特區七年，瓣瓣唔掂，好似冇咗個政府，榕樹頭時事評論家，名筆名嘴，兼政府喉舌，紛紛叫香港人要「自求多福」，即是話，要多多食自己。
點知，大量事實證明，港人自求歸自求，一樣係損壽夾折福。靈實醫院護士暗使橫手，收埋個救命鈴，搞到個病人嗌救命無門，含冤死亡。另外，天水圍倫常命案，女死者明明去過天水圍警署報案，警員拒絕落簿，話佢「無即時危險」，結果就搞出滅門三命，六歲稚女，喺幼稚園品學兼優，侷住監生橫死！
警方連番講大話，否認女死者報過案，以為死無對證。經傳媒踢爆，公共關係科總警司馬維騄（特區真係一個指馬為鹿嘅時代），聲稱傳媒與事實不符。都係鬼佬天良未泯，新界北鬼頭指揮官陳德立終於承認，女死者事發當日去過警署求助，但差人懶理，拒予記錄。
「冇即時危險」？咁4.11遊行示威，兼學聯反釋法遊行，秩序理性和平，又何來有「即時危險」，警方要動用武力插鼻窿，毆打記者，恐嚇傳媒？民主派議員出席維園論壇，個個星期遭到由土共長期指派嘅暴力維園阿伯辱罵動粗，重多次橫遭追打，司徒華七老八十，人身安全飽受威脅，警察就笑笑口蹺埋手睇嘢，究竟乜嘢叫「即時危險」，警方嘅行動指引手冊，唔知係咪經過人大釋過法，指馬為鹿，倒鹿為馬，搞到今日特區，鬼五馬六，好似日本㗎頭話齋，正一「八格野鹿」？
醫院護士收埋個救命鈴，縮短病人壽命，由好嘅方面去解讀，都或者係出於悲天憫人，覺得生逢特區混濁亂世，生不如死，早啲息勞歸主，早登極樂，喺電視見少啲曾憲梓、鄔維庸個樣，未嘗唔係一種解脫。但警方見死不救，疏忽職守，苦主命在旦夕，警員亂咁「判斷」，不分是非曲直，香港人平時納稅，養咗一批咩嘢嘅「紀律部隊」？
平時就嫉傳媒如仇，有理冇理，話呢樣與事實不符，嗰樣渲染誇張，總之就萬方有罪，佢永遠無辜。之前話冇，事後又認有，警方示範講大話技巧，又點樣協助呢個政府「行政主導」？唔想記者多事，又唔受立法會監督，自己就無事生事，踢爆之後又龜縮，遇着一個咁嘅時勢，短短七年，點解會搞成咁，你問我，我問喬曉陽，就算人大常委都難以解釋，或者明知答案，都唔敢解釋，點解香港人「當家作主」，自求多福，冇一瓣靠得住，變咗自求多仆！
傳真︰2623-9278
電郵︰