曾志偉擺大壽，大家齊慶賀。人緣好，賓客成晚冇停過，八時恭候，凌晨四點都重人頭湧湧。晨早響咗唔使買禮物，全部折現現金捐畀有需要嘅人，唔需要為買禮物而買禮物，唔使嘥埋啲無謂精神時間去買啲唔等使嘢畀已經乜都有嘅壽星公，又唔怕兩手空空去白吃白喝，大家各盡綿力奉獻，做咗好事玩得特別開心。
有自助餐食，有酒飲，重有現場樂隊伴奏，場中大把音樂人，殺得性起排隊衝上台，泰迪羅賓、鄧建明、鍾鎮濤彈結他，馮德倫打鼓，譚詠麟、鄭中基、叻哥、JoeJunior、梁家輝輪流獻唱，陣容鑽石過維港巨星滙。
壽星公當然有生日宣言，洋洋灑灑風風趣趣地講了半個小時，簡單地概括便是希望香港影視圈同業團結，自強不息，只有向前，不要退步；人人身體健康，開心快樂。
當晚最大嘅特色係大部份人都齊歡唱，冇乜人談政治，亦冇乜人談生意，大家百分百風花雪月，縱使飲大兩杯，都只係捉住老朋友講一啲關懷勉勵嘅說話，好耐冇參加過咁溫情洋溢，咁好玩嘅派對。
志偉老師兼老友，其實生日一年可以唔止一次，不妨新曆又搞，舊曆又搞，有得玩，大家一定到。