英超聯到最後埋尾階段，估唔到護級形勢又再起變化，布力般贏李斯特城，曼城輸畀修咸頓後，𠵱家真係好牙煙，降班賠率就愈嚟愈熱。
曼城主場輸畀修咸頓後，同尾三列斯相差得兩分，難怪降班賠率最熱只得三點五倍，雖然唔及列斯一點三倍熱到燙手，但係無人可以擔保曼城唔會降班收場。修咸頓領隊史杜洛賽後落井下石，完場時感覺到曼城主場球員同球迷，都開始為護級擔心；而背傷後首次領軍基瑾反駁，對班球員好有信心，最後四場聯賽可以翻身。
一直有傳俄羅斯財團來季入主負債四千萬鎊嘅曼城，但係如果降班，想人注資都難，重要賣球員填債，後果之慘真係難以估計囉！
果然英雄出少年！得十四歲，今屆效力美國足球大聯盟（MLS）球隊華盛頓聯賽嘅前鋒艾度，喺上星期六對紐約大都會嘅聯賽，射入咗自己喺MLS嘅第一球，可惜球隊最後都喺輸二比三被破不敗身。艾度就喺賽後話寧願球隊贏波，咁識諗，唔怪得之大把前途啦！
有聽外國音樂嘅朋友，對英國女歌手Dido一定唔陌生。我求大俠最近就八到單緋聞，話三十二歲嘅Dido同細佢九年嘅列斯前鋒阿倫史密夫拍拖！原來Dido一直係列斯嘅擁躉，重對史密夫好有好感。Dido人靚聲甜，形象乾淨，唔知史密夫同佢拍拖後，會唔會收斂火爆脾氣呢？
國足禮拜三訪巴塞隆拿，作為歐洲集訓第二場友賽，本來安排喺預備組球場踢，最後決定喺魯營球場，巴塞會員同小童免費。雖則巴塞聯賽大戰皇馬，但球會今夏亞洲之行想加中國一站，所以可能用數名主將。我求大俠覺得總好過對巴塞青年軍，話晒輸波畀朗拿甸奴都無咁失禮嘛。
德國人一向做嘢好有效率，不過唔知係咪有效率得滯，喺上星期六就鬧出笑話。話說慕尼黑1860喺聯賽輸咗畀漢堡之後，會方就公布將教練高斯炒魷，點知冇通知到高斯。當喺賽後記者會上，有人問高斯對被炒有乜感想，高斯就話：「乜我俾人炒咗咩？」咁都得？