宗教呢樣嘢原意係導人向善，但以日本嚟講，佢哋咁多本地宗教，而且久唔久就有啲邪教出嚟搞啲危害社會嘅嘢，好似最近XJapan嘅主音TOSHI，入教後俾人告佢虐待兒童，令到藝能界又再掀起討論教派嘅熱潮。原來好多女藝人都信奉日本本土嘅宗教，當中包括你同我都好熟識嘅常盤貴子同田中麗奈。
我羅拉睇雜誌《藝能BOX》話，日本有個勢力好大嘅「真如苑」教，田中麗奈、菊川怜同鈴木保奈美都係信徒，呢個教有好多喺廣告同事務所做嘢嘅信徒，可能麗奈佢哋就係因為咁而被接觸入教。
另一個香港人識嘅「創價學會」，松本人志嘅媽咪係中堅分子，所以有指先後同松本人志拍拖嘅常盤貴子同優香，都因此而同個教有唔少淵源。
重有，以前傳過中山美穗同一個叫「LifeSpace」有關連，不過呢個教涉嫌欺詐而俾警方調查。
各位可能會問，點解信教嘅多數係女人嘅？有行內人就分析：「唔少女藝人對將來不安，所以希望有個依靠。」咁都唔奇，女人到咗咁上下年紀，點都需要安全感嘅，女藝人拍拖同結婚都咁困難，難怪會以宗教信仰嚟做精神寄託。