經常睇電視運動節目播越野電單車比賽，總被賽車手高超靈活技術迷倒，心想，自己可唔可以都練得這身手？自己連電單車車牌都未有，就想一步登天？但原來在粉嶺有一個越野電單車場，可以連車牌都不用考就能鍊車，咁就要去試試身手喇！
記者：陳震霖 攝影：陳智良
模特兒：Karen、Ruby（Space2）
來到粉嶺恐龍坑的「香港越野障礙運動」場地，在大大小小不同跑道上，越野車正在飛馳。Karen有點怕：「我未揸過電單車，好驚危險呀。」教練安慰說：「這是香港政府首個合法認可的越野電單車場，場內賽道也符合FIM（FederationInternationaleDeMotocyclisme，國際摩托車運動員聯合會）所認可的越野障礙運動訓練場，重有我哋成班經驗教練喺度，唔使驚喎。」Karen心想，唔驚就假，「嗰款四個轆嘅似乎好好玩，不如玩嗰種囉。」是想壯壯膽吧。
玩這款80c.c.的沙灘四驅車，只需年滿8歲，毋須駕駛經驗，啪個掣就可以開車，初學者最好先玩沙灘車。雖然車速不算高，只有10km至60km，但一大班人你追我逐都好刺激。想跑出，秘訣係過彎位時不要只貼住內彎轉，否則轉向不足而跣出外彎，之後想加速會更難。正確做法是由外彎慢慢切入內彎，然後出彎時加速便會快好多。
朱教練於98年一項港台挑戰盃，成功擊敗來自台灣及本地，共50多位選手，獲得125c.c.全場總冠軍。
Ruby和Karen玩完四驅車後，開始心癢癢，想玩𠵱家至潮的綿羊仔。越野綿羊與普通綿羊仔不同之處，是越野車配備越野輪胎，特別避震。場內越野綿羊車只有50c.c.，車速通常由10km至60km。綿羊車不同四驅車，要懂得平衡，12歲以上才可以玩，幸好Ruby和Karen曉得踩單車，學識怎樣撻車後，很快就揸住架車滿場飛。
Ruby和Karen玩得興奮，忽見有人在玩越野電單車，膽粗粗想試，「你哋唔玩得住㗎，因為越野電單車技術同體力的要求都較四驅車和綿羊高，就算你有電單車經驗，要玩都必須先通過場地嘅訓練課程。」教練如是說，既然如此，惟有在觀眾席睇人練習。望着場內車手上落大、小障礙、轉急彎、彎位上坡、甚至飛躍，看得兩姝目瞪口呆，興奮莫名。
阿恒之前玩了2年多125c.c.電單車，間中會去珠海參加比賽，偶然機會下，接觸到越野電單車，立刻上癮，至今已玩了三個多月，「我覺得兩者最大分別係，越野車不止講速度，在車子騰空嗰刻，時間好似停留一樣，好刺激。行車時又會經常甩尾，很難控制，好考車手技術。」
玩越野車唔係大人的專利，8歲開始可以玩四驅車，12歲就可以玩綿羊仔，而越野電單車甚至歡迎8至14歲青少年玩，不過所駕駛的是小型越野電單車。玩之前，教練會評估青少年的駕駛技術，再決定是否可以與大人同場較量，否則只可分開獨立玩。14歲以下的青少年，會以教練學員一對一的比例教授；其餘成人班，每班最多15人，有兩位主教及兩位助教。
場內設有醫療室，所有教練及部份工作人員持有聖約翰急救證書，觀眾席亦長期有工作人員監察比賽過程，確保駕駛者安全。但由於場內電單車只買了第三保，只包跑道外車場內的保險，所以玩家也要小心為上。
越野四驅沙灘車
初級：$370（1小時30分理論，1小時30分實習）
中級：$380
高級：$390
越野綿羊電單車
初級：$390（1小時30分理論，1小時30分實習）
中級：$400
高級：$410
越野電單車
只適合已完成四驅車及綿羊車課程人士
收費：$1,300（8小時）
現優惠蘋果讀者，只要拿着這份報道，就可以$120玩到原價$150嘅綿羊訓練班或越野四驅訓練班，包30分鐘落場鍊車及30分鐘講解。每份報道只限優惠2人，影印本無效。
於粉嶺火車站的小巴總站搭52K（$4.5）小巴到總站，會場再有專車接送。
香港越野障礙運動
地址：香港新界粉嶺坪輋恐龍坑泥路415-418
電話：26598111
營業時間：星期一至日11:00am至11:00pm；逢星期四休息，公眾假期照常營業。
