港股上周驚美國加息，結果美股跌幅都冇港股咁大。上周五，美股止跌回升，港股料會跟隨，可以趁低博反彈。地產股重創，新地（016）同長實（001）1周分別散咗3.50元與3.75元。博佢哋反彈，揀相關Call輪埋手。
新地Call輪兩件對象係9118同9511。9118下月夠鐘，輪價78仙，本來時日無多嘅輪要避開，但9118已跌至負溢價0.1%，唔怕溢價再收縮，槓桿率9.2倍夠爆炸，而又買賣容易，所以啱短炒。9511喺7月夠鐘，輪價48仙，槓桿率14.9倍，但溢價7%唔低，值博率冇9118咁高，但高過好多其他新地Call輪。
長實Call輪主角係9643，8月到期，輪價38仙，溢價9.5%，槓桿率16.8倍。老實講，隻輪溢價唔低，但其他同類輪溢價更加唔見得吸引。若然唔嫌交投疏難買賣，可以揀9330，6月夠鐘，輪價亦係38仙，槓桿率亦係16.8倍，但溢價只有1.6%。
和黃（013）若然跌多幾格，見上月低位，亦可細細注博技術性反彈，揀Call輪，對象有兩隻，9370同9058。前者6月底到期，輪價27.5仙，溢價5%，槓桿率20.2倍。後者壽命長多幾日，輪價32.5仙，溢價亦係5%，槓桿率17.1倍。
章盛