九月立法會選情日日新鮮，八方上個月中同民主黨人食晏，席間羅致光興致勃勃話剛向負責選舉工程嘅李永達遞咗參選意向書，九月循社會服務界競逐連任。
點知話口未完，呢兩日忽然見到社聯行政總裁、陳四萬親戚、已退出民主黨嘅方敏生高調話，如果羅致光真係唔選，又冇合適人選，佢可能會親自去馬。
此言一出，八方估一定有變，四圍搵當事人，點知羅致光唔覆call，於是問李永達乜情況啦，達仔好苦惱咁話，羅致光最近真係有傾向想唔選，佢同楊森以及何俊仁已經同佢坐低傾過一次，但係重要傾。
社福界其實重有理大教授張超雄同社工總工會張國柱話要出嚟爭，達仔好唔開心咁話唔知羅致光諗緊乜。八方記得，羅致光差不多每次選舉前都話唔想選，今次都唔例外，但係佢今次話「係真嘅唔想」喎！
傳真︰2623-9278
電郵︰