讀董橋社長鴻文，好似上一堂課，得益良多，社長講嘅四五十年代中國知識分子故事，更令淺薄如左丁山者，知道更多歷史。
社長喺四月十四日講「陳夫人美好的老歲月」，裏面提到嘅人物，左丁山只知道（唔係識得）一個喬志高（原名高克毅，英文叫做GeorgeKao，所以寫文章用筆名就叫喬志高，好到冇得頂），左丁山讀中學時，就睇喬志高喺《明報月刊》嘅美語新銓文章，偷師學英文。社長講陳夢家嘅遭遇，惹人欷歔，大抵四十年代末、五十年代初回國，或留低唔走嘅教授文人，遭遇多數如此，浪費太多嘅寶貴時光。
以前聽一位老人家講，蔣介石離開大陸之時，曾派專人去勸走「一級知識分子」，請佢哋逃去台灣。但好多人痛恨國民黨腐敗，鄙視蔣介石，對共產新中國有憧憬，唔肯跟大隊去台灣，留在北京、上海，點知後來唔少含恨而終，或遭反右風、文革逼害至死（如陳夢家、老舍），或者終身學術生涯受到極大摧殘，反而走咗去台灣嘅（如傅斯年、胡適）、美國嘅、香港嘅，重可以發光發熱，創下另一番成就。如果陳夢家、趙蘿蕤、巫寧坤等去咗台灣、香港，留響美國，佢哋嘅成就當然會更大。
以前左丁山幾同情陳夢家等人物，年紀大咗，閱歷多咗，愈發佩服唐君毅、錢穆、牟宗三等一流人物，目光如炬，一早睇得通通透透，情願走嚟香港捱窮奮鬥。與佢哋相比，好多文化學術人未免過於天真（如羅隆基、儲安平、章乃器），後人遂有往事並不如煙之嘆。