鍾意睇Cult片嘅戲迷，相信無人不識昆坦泰倫天奴呢位怪雞導演，三套自編自導電影《落水狗》、《危險人物》及《危險關係》，令佢成為90年代美國最具爆炸性及影響力的KingofCult導演，最新DVD力作《標殺令》，一樣玩轉黑色幽默、人性荒謬，最令人驚歎者，是將血腥暴力昇華至美學層面；DVD一落場，馬上成為本周最搶手3區碟！
記者：朱崇德
唔知𠵱家潮流係咪興玩三部曲，《標殺令》亦好巧合地分為3集（傳聞可能會另加一集外傳），今次DVD版係全系列的首部曲，嚟緊本月底，香港戲院將會上映第二集，發行商寰宇好似有心叫大家重溫舊劇情，上戲院睇第二集！
昆氏由一開始編寫《標》時，已開宗明義要將佢最心愛嘅4種電影集大成；故事背景講女殺手（奧瑪花曼飾）為婚姻而脫離殺手組織，但婚宴上卻受到首領標為首的「意大利黑手黨式」大屠殺，奧大難不死，昏迷4年後轉醒，決心要單人匹馬大復仇！
昆氏都講明自己係「邵氏武俠片」迷，所以故事的推展，就是奧有如張徹大導演筆下的《獨臂刀》，重練身段及功夫，單人匹馬加一把「日本武士」刀，跟每個仇人逐一比武，誓要將標殺手集團全個挑起！
論全片最經典場面，印象最深有兩幕；首先是電影中段，憶述大反角石井阿蓮（劉玉玲飾）目擊黑道父親被血殺的一場戲，講真呢一幕真係拳拳到肉兼血、肉大賤賣，再加涉及孌童癖呢啲敏感話題，可能因此而大膽起用「日本動畫」作表達（否則電檢絕對唔止列佢為三級！）；不過效果亦相當好，須知他是以曾炮製《人狼》及《攻殼機動隊》的日本頂級動畫製作公司ProductionIG操刀！
全劇高潮當然係尾段嘅單刀力挑日本青葉屋啦！奧着起李小龍《死亡遊戲》經典黃、黑緊身衣，攞起武士刀有如斬瓜切菜般，挑下東京第一大幫會（咁似李小龍啲橋段嘅），然後再單挑石井阿蓮，論畫面配搭及武打功架，簡直係將爆炸性暴力，同唯美嘅畫面影像集大成！真係好難估到係由西人拍的武打片！
電話：25631327
