真係好難唔信邪，「秋官效應」次次都好應。秋官套《血薦軒轅》呢個禮拜二十四號就大結局，八方記得套戲上個月八號首播當日，港股走勢明明唔錯，收市升咗近百二點，點知套戲當晚一播出，個市第二日即跌。由嗰日開始到上個禮拜五，港股已經由一萬三千五百七十三點，跌到一萬二千四百五十八點，足足跌咗成一千一百幾點！
八方統計過，《血薦軒轅》播到上禮拜五，總共經歷咗二十六個交易日，其中十日升、十六日跌，港股可謂飽受秋官「蹂躪」。上禮拜三港股單日跌咗三百六十一點，跟住兩日重跌，夾埋跌咗五百七十點。一日跌三百六十點雖然都係勁，但單日跌五百零一點都試過啦！
讀者可能唔記得，喺舊年十月二十三日，當時電視播緊秋官套《非常外父》得二十集，同《血薦軒轅》一樣，都係播到做完之前嗰個禮拜，就出現單日大跌，真係橋到你唔信。
如果《血薦軒轅》對港股嘅影響，重演《非常外父》情況，咁股民就唔使咁擔心港股呢個禮拜嘅走勢，因為《非常外父》最後一個禮拜播映時，港股升足五日，其中一日重升咗三百點，套戲播完之後又升多近二百點㖭。即管睇埋呢個禮拜個市係咪會升番啦。
（圖）汪明荃：多得你唔少 秋官：關我乜事！
設計對白《血薦軒轅》劇照
傳真︰2623-9278
電郵︰