打破日本藝能界愈紅愈收埋身材傳統嘅佐藤江梨子，近來又有新搞作，喺佢過幾日就出嘅新寫真集《轉移》入面，佢專登扮低級扮cheap，不過佐藤話呢種係率性自然喎。
佐藤𠵱家又拍廣告又做電影女主角，連散文作家都撈埋，有睇開高檔女性雜誌嘅姊妹，都知道佢係常客。所以我羅拉睇本寫真集嘅相，唔單止激過以前好多，有好幾個shot重直情好似鹹書咁，真係戥咁辛苦上咗位嘅佐藤慘，今時今日重要咁樣作賤自己。
佐藤表面上就話：「因為我到𠵱家都好鍾意拍水着相囉！」但根據日本記者所講，原來以往紅如雛形明子、小澤真珠等水着女星上咗岸之後，都即刻由「水着畢業」變咗失業，可見佐藤用呢招嚟keep番班舊fans，的確係一種聰明嘅做法。
佐藤能夠咁紅其實重有一個原因，就係佢好識同記者搞關係。好似前日佢出席一本雜誌嘅宣傳活動，唔單止着埋佢喺電影《CutieHoney》時着嘅衫去滿足片商，當被記者問到有冇拍拖時，佢重講笑咁話：「我啲戀愛運真係差！係咪要求高？高就高，不過係我個人囉！」認真識搞氣氛。