港股大散兩日，恒指唔見552點後，算係喘定，只係再跌20點。成份股中，最巴閉嘅係中海油（883），收3.35元，升4.7%。
中海油掂，中海油Call輪亦掂。標準輪9421升31%，收18.4仙，8月夠鐘，溢價9.2%，槓桿率9.1倍，龍虎榜上跑第一。另一隻窗口定界輪9432，升27%，收16.4仙，跑第三。高溢價輪同特種輪，好難賭，要賭，可以揀啲溢價低嘅標準輪，例如9032同9255。9032今年6月夠鐘，輪價28仙，負溢價0.4%，槓桿率6倍。9255喺7月夠鐘，輪價37.5仙，負溢價0.7%，槓桿率4.5倍。
係人都知，Call輪要升，必須有正股帶動，類似中海油嘅大隻股，係基金股，基金啲錢流入去，股價自然升，最難就係唔易估中佢哋幾時郁手。重有，就係啲油輪平日成交少到唔恨，到正股郁之時上車，已經要買貴好多。
是日平淡市中，又有啲基金錢流到公路股。滬杭甬（576）升30仙，收6元。隻股往績PE27.4倍，預測22倍，好難話平，但啲錢流入去股價就升。滬杭甬Call輪有幾隻上榜，9294收45仙，彈升25%，6月到期，溢價5.5%，槓桿率13.3倍。9304收23.3仙，升19%，下月夠鐘，溢價3.9%，槓桿率25.8倍。要喺呢啲Call輪上搵食，都好艱難，交投疏，買賣唔易，而正股升升跌跌，又好難捉摸。
章盛