復活節長假後第一個周末，大家的魂魄應該返齊囉？咩話？未夠喉？今明兩日「飲食人誌」會帶各位去歎有度假Feel的西餐，周末HighTea，周日Brunch，不一定要大路酒店同人迫，以下有好介紹，一間法國餐廳，食住美食望海景，另一間則帶地中海Feel，有露天Resort情調，兩間餐廳開業都只是幾個月，無論是想換個歐遊夢抑或懷緬殖民時代，百幾蚊肯定抵夾爽！
記者：李湘虹 攝影：林栢鈞、陳盛臣
模特兒：Gody、Wendy、Sindy（RichStrategy）
位於IFC二期的LeParisien原址在鰂魚涌，店面積較小，上年10月搬來新舖之後，頓時成為最新坐擁無敵大海景的高級法國餐廳。本來只在周末、周日才有的HighTea，現在做到每日提供，行政總廚Pascal解釋道：「我們這兒主要客人是附近的行政人員，午市一定座無虛席，每逢煙花表演更早已訂滿位。不過始終在大型購物商場，要顧及香港大眾的口味，所以我們把HighTea推至每日菜單中，順便在下午茶時間吸引新客，一舉兩得。」
我國是茶的故鄉，早於唐朝茶已是日常飲料，但直至公元後才傳至其他國家。英國人愛茶之切，便直接或間接引發不少歷史事件，如第一次鴉片戰爭和波士頓茶黨等。英式下午茶約於19世紀開始，據說是當時勞工階層下班後的晚餐，亦有云是一位公爵夫人為消除晚餐前空腹之感而設，後來發展成中上流社會一種交際活動，至今英國人仍承襲飲用下午茶習慣。
選擇多
飽覽全維港景已經夠架勢，還要好閒適地歎HighTea，可問句邊個夠我High。嫌傳統大吉嶺茶悶，可試其他生果口味或瑞士咖啡，聖誕樹Teaset上，頂層有煙三文魚、薄荷青瓜忌廉芝士、巴馬火腿三文治，下層的蛋糕有藍草莓、開心果、杏仁和牛角包，餅點有朱古力Ganache、香橙撻和兩款泡芙。
肥美不膩
初見達兩吋厚的烤澳洲羊肉，加上面頭的法國鵝肝，以為一定十分肥膩。誰知鵝肝包在雲吞內，入口即溶，芳香凝留。羊肉肥美而不膩，因為預早以薰衣草和橄欖油醃過，再與蔬菜如番茄蒜頭煮過，配搭一流。
外脆內軟
這個朱古力慕絲在鰂魚涌老店已有，新店曾停做，但客人抗議，於是再在新店菜單出現。這個慕絲做到外層鬆脆，內裏一層比一層軟滑，最難得是耐放，加上高達64%的可可成份，香味濃郁，食過心都軟。
高貴頭盤
點解高貴，只因前菜已用上波士頓原隻龍蝦，先煮三分鐘，去殼，加上微溫檸檬油，食落鮮甜無比，其肉之嫩滑比Kingsize更可口，再蘸龍蝦原汁吉士醬，配以鮮香的番茄和蘆笋沙律，清新健康。
LeParisien（28055293）
地址：中環國際金融中心商場二期二樓2076號舖
HighTea供應時段：每日3:00pm-5:00pm
營業時間：11:30am-11:00pm
座位：100個（大廳及室外），12個（VIP房）
睇完無敵大海景，再去睇間露天餐廳。各位靚女在皇后大道中掃完貨，行到腳仔都軟，最就腳是上連卡佛大廈5樓的「Talk」。這間上年12月新開的地中海餐廳，布置簡潔鮮明，座位非常闊落，最啱食下午茶甚至早餐，難怪他們剛推出一個SundayWorldBreadfasts。不過今日周末我們先歎番個HighTea，無論是Tobeserved抑或Buffet形式，這兒的糕點都是精緻新鮮的，絕不比酒店遜色。
鹹甜點即日製
餐廳每日準備的都不一樣，有鹹有甜，每位8件。甜的都是每日新鮮焗製，可能是意大利檸檬Puff、薏米撻、咖啡芝士蛋糕、拿破崙蛋糕、Meringue蛋白霜等等，雖然叫Set不能選擇，但你一定不會失望。
選擇多鹹點
鹹點大多都是即場做少許，食完再做，保證暖笠笠。三文治有哈蜜瓜巴馬火腿、意大利辣腸等，還有芝士煙肉酥皮卷、吞拿魚Minipizza、香草薯茸塊、蝦肉Canape，薯波內更釀有意大利飯、肉鬆等，必有驚喜。
其他選擇：清爽鮮味
這道Gorgonzola忌廉汁配自家製黃綠Pasta，出奇的新鮮可口，連裏頭的Scampi海蝦、魚子醬、煙和生的三文魚都比下去。
肉汁豐富
羊扒來自新西蘭，以紅酒、香草和蔬菜煮過，絕無羊的難擋羶味，原汁鮮美，燒得剛好不出血，纖維紋絡仍清晰可見，難怪每口都是享受，須用心慢慢細嚼。
Talk（31022272）
地址：中環皇后大道中70號連卡佛大廈5樓
HighTea供應時段：每日3:00pm-6:00pm
營業時間：10:00am-7:30pm（星期一至六）；10:00am-7:00pm（星期日）；12:00nn-7:00pm（公眾假期）
座位：80個（室內），25個（室外）
