鄭伊健自從「奪麵雙琪」事件之後，事業就走下坡，佢簽咗英皇三年唱片約，點知三年嚟冇出過唱片，認真悽慘，諗住轉攻拍電影，點知票房又唔係咁得，真係四面楚歌。不過今年伊健似乎會有起色，皆因佢又簽番唱片公司，最起碼可以出番唱片先。伊健當初離開BMG入英皇，喺BMG幾番人事變動之後，佢食番回頭草，唱片公司肯簽番佢亦實在難得。
伊健重返BMG懷抱，定咗後日星期一搞記者會，馮仁昭噚日同BMG嗰邊傾過偈，佢哋話伊健今次回巢價係八百八十八萬八千八百八十八蚊，取其好意頭喎。佢重會喺五月出新碟，嚟緊四月尾伊健又會以歌手身份為無綫一個明愛騷做表演。
至於伊健重返娘家嘅感受，就會留番記者會先講，不過佢嘅好兄弟陳小春噚日話：「恭喜伊健啦，佢能夠返BMG，我梗係開心，唔使得我一個香港歌手咁悶，等我同公司傾吓有冇機會畀我哋合作先。」
任賢齊本月底喺紅館舉行兩場演唱會，近日一直忙於綵排，噚日黃品源突然出現探班，畀咗小齊好大驚喜，黃品源重帶咗三樣滋補小禮物為小齊打氣，分別係枇杷膏、跌打膏、同埋一位按摩師傅，認真有心思，令小齊好感動。
楊千嬅噚日喺三名助手陪同下出現機場，準備去潮州演出，千嬅雖然成日都出埠工作，但係佢噚日就好烏龍，竟然喺入閘時先記得冇填到健康申報表，搞到要喺閘口即刻補填，佢話：「我今日返鄉下潮州義唱。」現場差唔多十個歌迷送千嬅機，認真有心。
林海峰噚日喺土瓜灣一間冰室舉行記者會，宣布正式加盟有線電視主持新節目。林海峰話節目主要係圍繞娛樂新聞，重話唔止請TVB嘅人上去，重希望請埋萬人迷碧咸㖭，佢話：「我會放晒啲攝錄機喺中環、跑馬地啲明星蒲點，直擊整個去蒲過程。」問到佢係咪因為奶粉錢而加盟有線，林海峰話：「養個細路哥唔止奶粉錢！」
林熙蕾日前同男模阿丹遊峇里島，戀情爆光，噚日林熙蕾由台灣嚟香港出席LV派對，喺機場俾一大班記者包圍，不過佢冇正式回應戀情，淨係話私人事唔想答。至於阿丹方面就話自己係男仔冇乜所謂，阿丹嘅經理人就解釋話同行重有三個朋友，唔知會唔會愈描愈黑呢？
鍾鎮濤女友范姜𠵱家有咗六個月身孕，佢除咗個肚大之外，手腳同面都唔算肥，但噚日有周刊話張玉珊想搵范姜做瘦身代言人，重話出一百三十萬酬勞，噚日范姜話覺得單嘢好奇，張玉珊都冇聯絡過佢。張玉珊喺電話度話：「我唔想人哋有BB就借人宣傳，如果范姜生完想纖體，我好樂意贊助佢。」搞到呢單嘢十足十免費宣傳咁。
許志安緋聞女友胡敏珊前晚穿着吊帶背心，出席一個名牌派對。胡敏珊話最近喺美國返嚟，本來諗住搞護膚品或者化妝品代理，但因為太多人做嘅關係，最終都係決定做番老本行，搞鐘表生意。問胡敏珊嘅感情生活點樣，佢就笑笑口話冇人追，重話工作至上喎，唔通安仔重未夠魅力，令到胡小姐心動？
