港股持續下跌，不過跌勢已放緩，成交亦減少，基金減磅行動難道已告一段落？恒指全日只跌20點，收報12458，成交減至151億元。
山東墨龍（8261）前日上市，逆市升4.3%，噚日急升12.3%至0.83元，但成交唔多，只得737萬元。黑客話，墨龍主要生產採油機械及有關零件，國內石油公司近年不斷發現新油井，自然增加對相關產品的需求，所以上市時已獲部份中型基金垂青，認購後並無沽貨，二手市場成交自然唔多，如果日後大市氣氛轉佳，或有更佳表現。
合和實業（054）發展灣仔MegaTower一波三折，計劃遭城規會否決，加埋最近技術走勢轉差，雖然噚日反彈2.9%，收報14.40元，但下周可能繼續調整。
市場傳出國內機票價格將於五一黃金周前調高，南航（1055）及東航（670）分別逆市上升5.8%及2.5%，表現相當突出。
Cookie話要留意埋隻富豪（078），相信短期內會有表現。富豪除咗有黃金周概念外，公司可能會賠訂買番富豪東方，聽講賠訂方式已經修訂，由賠現金3000萬元，改為賠最多3900萬元新股畀買家蔡志明，因此富豪股價升得愈高，對富豪就愈有利。
世城系早前負債重，好耐唔見有證券行為此系撰寫報告，但近期情況大為改善，百記剛為富豪出咗份報告，預期今年勁賺10億元，目標價0.364元，兼且跑贏大市。
阿虎