亞洲鋁業（930）自從上月底公布業績盈利倒退後，引起好多芬佬不滿，猛問管理層因乜原因唔一早發盈利警告，並進行大洗倉，亞鋁股價由高位1.70元插穿1元。
近日亞鋁走勢非常反覆，有時會失驚無神勁跌，但第二日又彈番唔少，非常古怪。原本小初以為係大戶未沽完貨，托住個價嚟沽貨，但經紀黃話唔係，原來有部份芬佬雖然激氣，但仍然唔死心，繼續溝貨之故，所以亞鋁股價先至咁反覆。
芬佬增持原因唔難明，皆因佢哋高位坐落好多貨，並唔係一時三刻可以沽得晒，惟有繼續溝貨，以減低成本價。
經紀黃又話，咁樣唔代表散戶可以跟風，皆因佢收到風，有班機構投資者條氣好唔順，話點都唔肯就此罷休。但小初唔明白，佢哋除咗用腳投票外，重可以做乜嘢？經紀黃陰陰笑唔肯講。
亞鋁噚日低見0.89元，收0.96元，升6.7%，成交股數有3919萬股，金額3648萬元。
慕容小初