香港呢幾年捱得幾辛苦，自○三年八月開始，叫做有啲起色，𠵱家樓市當炒，據經紀講，有夜總會老闆一口氣買咗十二個「君臨天下」單位，獲利甚豐，好快就全城陷入瘋狂矣。大記者上星期日去火炭探朋友，見到一條寂靜街道泊滿靚車，一望而知就係睇樓用家?炒家殺到，大記者話：「九七風暴，重現眼前。」
每次地產市道起落，都帶來財富大轉移，假如豪宅渴市之勢維持到○五年尾，唔少人會發達，亦有唔少人賣樓移民。喺炒家之中，有一位紡織製衣界嘅太子N，佢同左丁山講：「假如一切按照時間表行事，明年嘅全球紡織配額就會取消，我屋企公司手上嘅配額，會冇晒價值，老竇話少少哋我哋一年唔見咗幾億銀收入，你話去邊度可以搵得番？所以趁住旺市，我不如炒樓炒幾轉，搵啲使用先！」
太子N家族都未算大輸家，最大配額持有人，一年可能唔見幾十億元㖭，冇咗配額炒賣呢條大水喉，某些家族太子，都唔知點算。太子N嘅同學太子C就啱啱相反，對配額恨之入骨，因為佢老頭子入行比較遲，十幾年來製衣出口，全賴買配額，俾太子N賺咗唔少。太子C話：「我哋先至係做實業嘅，呢幾年成衣生意出口旺盛，賺得幾和味。明年唔使買配額，肯定賺到笑，希望美國經濟順順利利，我就輕鬆晒。」太子N間家族公司，多年不事生產，只靠賣配額，太子C就拚命生產，為太子N等配額持有人賺錢。卒之等到天光，食配額之人可以上岸食利息！