焦點豪宅盤薄扶林貝沙灣，新一期南灣登場，電盈又再炮製大堆頭製作。
除咗花費2000萬元，重新粉飾充滿海洋格調嘅售樓處，同埋3個示範單位之外；介紹物業嘅售樓書都落足本，用大型粉藍色禮盒（冇錯，就係T字頭嗰間著名珠寶店）包裝，重搵專人炮製咗芬芳撲鼻嘅香包，整埋一套精品咁送畀客戶。
咁有份量嘅製作，果然同個樓盤成正比。
蘭西噚日喺售樓處睇到樓盤嘅模型，中間穿窿聽講原來係SkyGarden嚟嘅。
電盈基建主席李智康話，數碼港成個項目，包括住宅、寫字樓同酒店等陸續落成，𠵱家構思緊同旅發局合作，到時會搞個本地一日遊，帶大家認識數碼港，去埋黃竹坑海洋公園同香港仔珍寶海鮮坊，宣傳自己集團嘅物業之餘，順便做埋無煙工業，一舉兩得。
住宅樓價升咗咁耐，究竟市民點睇樓市呢？香港理工大學就推出咗個「香港住宅樓宇BRE信心指數」話畀大家知。
呢個指數由0至1000，低於500代表市場對樓市態度負面，相反就梗係看好啦！今年3月做嘅調查指數係556，可以話係對樓市前景樂觀。
負責呢個項目嘅首席研究員兼理大建築及房地產學系副教授許智文講，近期本地經濟環境轉佳，失業率下降；加上政府推行措施，協助振興本地樓市，都令市民信心向上。
上市公司每年都會刊印年報，派畀股東，但係冇上市嘅富城集團，原來連續3年都有印年報，蘭西就啱啱收到一本。
呢本年報，着重講集團過去一年嘅工作成績，所以又可以當係一本公司簡介，而啲圖文都係由公司負責提供。睇番富城管理嘅物業同設施，雖然「只係」得320項，但就印咗1萬本，原來係因為有啲屋苑業主代表人數超過1個；另外，又會送畀政府相關部門，同埋畀其他客戶等，所以要印番咁上下至夠分。
𠵱家有印年報嘅物業管理公司，除咗富城，聽講就只有上市嘅新昌。
蘭西
電郵地址：
