孔慶翔近排紅透半邊天，雖然佢最近推出嘅大碟《Inspiration》只能喺Billboard大碟榜排三十四位，但係喺網上銷售榜，首周上榜就高踞第六位，你都咪話唔犀利。
孔慶翔因為翻唱RickyMartin首歌《SheBangs》一炮而紅，所以有好事之徒提議搵番當年曾經同RickyMartin合作拍攝歌曲《LivinlaVidaLoca》MV嘅性感模特兒NinaMoric出嚟，同孔慶翔合作多次，但Nina已經拒絕咗，據知理由係「冇辦法同一啲令人討厭嘅儍瓜合作」。
而繼孔慶翔之後，遲啲可能會有更多騎呢歌手面世，事關美國電視頻道WB計劃下個月開始推出一連七集嘅節目《SuperstarUSA》，節目入面一班參賽者會好似《一夜成名》咁喺評判面前表演，但係唱得好嘅反而唔會被取錄，只會揀啲古靈精怪嘅出嚟，佢哋重有機會贏到價值十萬美元（七十八萬港元）嘅唱片合約㖭。
另外，昆頓塔倫天奴（QuentinTarantino）日前就上去《一夜成名》做嘉賓評判，佢重同一向尖酸刻薄嘅SimonCowell唱雙簧，起勢咁彈啲參賽者，最後塔倫天奴重俾觀眾喝倒采。