九龍倉大老闆吳光正有新動作。唔係特首跑馬仔有進展，亦唔係寫鴻文，而係私人買起九倉名下的近四成City'super超級市場股權，睇嚟吳老闆非常睇好香港零售市道，所以買完Joyce同連卡佛之後，仍繼續出擊。不過呢單City'super交易只係值一千五百二十萬，以吳老闆標準，九十隻牛一條毛而已。
自從City'super在國金二期開新舖後，八方行過好多次，見過唔少名人幫襯，亦見愉景灣居民大包細包買完就行天橋去搭船，聽講搞到愉景灣裏頭啲同行牙痛咁聲，因為俾人截晒胡。
呢間名牌超市，走高級路線，第一間舖喺時代廣場，第二間開喺尖沙嘴海港城，跟住喺又一城又開兩間LOG-ON，重喺新港中心開美食廣場。雖然佢賣嘅貨唔平，並非自由行旅客對象，亦冇受惠於「屍爬」，但近兩年都好掂。前年賺成四千三百萬，去年差啲，都有七十萬執。以吳老闆嘅眼光，呢間超市前途無可限量。
吳老闆乃商業奇才，對政治亦好有興趣，佢不時發表論政鴻文，特別有領導人來港時。佢嘅公職亦做得好好，醫管局當年有聲有色，貿發局現在亦揚威巴賽爾。
咁嘅人才，中央唔應該走眼嘅。最緊要重係夠政治敏銳，即如呢一單小交易，要登通告廣告股東。你估登喺邊？係《中國日報》香港版呢。
（圖）吳光正
傳真︰2623-9278
電郵︰