港股噚日一度跌穿12400，市場傳出外資減磅，資金流出股市。不過，恒指最後跌幅收窄至190點，收報12479，成交增至239億元。
利福（1212）首日上市收報8.30元，與招股價相同，成交3.87億元，相當於大劉減持華人置業（127）套現的金額一半左右（1.5億股，每股4.85元，套現約7.27億元）。大劉有冇入市買賣，阿虎唔多清楚，不過保薦人百記就相當落力，幾乎全日都見佢在8.30元水平力頂，售後服務算唔錯，唔知百記今次要坐幾多貨呢？
華置股價繼續偏軟，低見4.50元反彈，跌幅收窄至0.5%，收4.725元，似乎企穩咗。
黑客話，整體大市表現雖然唔理想，但復活節後好快輪到五一黃金周，據聞唔少炒家已開始收集零售、消費、酒店及旅遊等自由行概念股，正部署大炒。股民近排不妨留意呢類股份。上次炒自由行概念股，主打有恒豐金（870）、莎莎國際（178）、卓悅（653）、周生生（116）、六福（590）等等。當然，東航（670）及南航（1055）亦不應忽視，因國內機票傳聞將會加價。另外，持有崇光百貨嘅利福，照計都會受惠，噚日企得咁硬，或者有後福。
華燊燃氣（8035）兩度被證監罰停賽，最近重一度謠傳主席沈家燊在國內被拘留，令人感到事件並不尋常，雖然該公司已否認主席被拘留消息，不過阿虎奉勸各位股民，當一隻股份被證監勒令停牌，空穴來風定有因，一旦復牌，有貨者應該知點做。
阿虎