大市好似食咗瀉藥咁，搞到小初都冇晒心機，好彩臨尾大市跌幅收窄，好多股份由低位反彈，小初先至重拾些少信心，但身邊好多老友唔知係咪被嚇親，大多數睇得相當淡。
好多大戶炒家，早排成日搞呢搞路，但呢排已經靜晒，相信亦係睇唔通之故。不過，經紀黃噚日品題嘅立信工業（641），表現就相當硬淨，逆市升0.7%，堅守7.60元。小初問佢今日有冇好介紹，佢話理文造紙（2314）可留意。
理文造紙上個月底，在上市夠半年後就立即搞批股，以先舊後新方式，每股6.745元批股，集資8.1億元，大股東認購新股1.2億股，比批出街嘅舊股5300萬股更多，反映大老闆非常睇好公司前景。
及後理文造紙股價雖然一度跌穿批股價，但最終亦上番7元樓上，就算呢兩日遇上大跌市，股價仍然企硬，噚日平收7.15元。
經紀黃話，理文造紙股價企硬，除咗大部份貨源由芬佬坐住之外，亦因公司營運好。
慕容小初