港股連續大跌兩日，噚日恒指最低落到12358，大跌311點，午後有反彈，收12479，跌190，成交大增到239億元，期指低水則收窄到39點。跌市而成交多，大市應未到底。
今次大市試底，係意料中事，禮拜二恒指剛創出13126的反彈高位，兩日之後，又再創出今次跌市嘅新低，高低相差成768點，變化好大。本來急跌之後，理應會有反彈，但噚日午後嘅反彈，力度認真麻麻，所以，短期對反彈唔好寄予太大期望，彈完之後，大市仍會繼續尋底。
港股連續上升11個月，由3月開始中期調整，初步估計，調整低位會在12200至12000水平，預期跌幅不會大，但會在低位整固一段較長時日。
國企股去年業績「靚爆燈」，今年首季，仍陸續有好消息。中海發展（1138）發出盈利預告（唔係「盈警」，而係「盈喜」），話下周五公布的首季業績，純利可能有逾倍增長。
由於國際航運市場持續向好，內地經濟高速增長亦帶動運輸需求，加上運力增加，公司已表明，04年盈利仍會有理想增長。今年首季，內地煤炭運輸收入較去年同期升84%，而油品運輸收入則升13%。
中海發展03年營業額48.85億元（人民幣．下同），升19%，盈利10.24億元，升73%，表現比市場預期為佳。集團經過多年業務重組，已完成第一階段改革，今年開始第二階段發展，油輪運力和散貨輪運力將分別增加60萬噸和17萬噸，加上明年將接收的11艘新船，將使運力再增加124萬噸。去年底，集團擁有貨輪及油輪運力合共441萬噸。
04年，預計盈利可上升至14億元，每股盈利0.4元，05年更可去到16.5億元，每股盈利0.5元（折0.47港元），現價05年PE只係11倍，股價有頗大上升空間。
ING證券指中海發展的「盈喜」，顯示各業務的綜合毛利率持續改善，且較預期為高，維持買入評級。
中海發展近4個月來低位在5元水平，可候機吸入，中線目標價6.5至7元。
郭兆誠