民航處處長林光宇返埋今日工，就要同做咗四十一年嘅民航處講拜拜退休。佢噚日榮休前同記者茶敍，話自己其實最想做警察。當年喺九龍華仁讀完預科走去考警隊，點知話佢未夠秤唔收佢。之後考入民航處重想做警察，阿媽同佢講「好仔唔當差」。雖然佢當年唔同意阿媽嘅諗法（喺反釋法示威武力清場後，阿媽嘅諗法或者唔錯得晒），但好有孝心，留喺民航處。
最鍾意着制服、形象man到極嘅林光宇，加入民航處之後，發夢都想做「戰鬥機師」。佢話學咗五個鐘，已經揸得掂架飛機。結果平步青雲，做民航處處長，呢個位，今時今日風平浪靜，唔似做警務處處長，隨時俾人話好狗。自稱敢於接受挑戰嘅佢話，退休休息幾個月，會加入私人機構，至於係邊個大集團咁有眼光，佢就話暫時唔講住，等記者估下喎。
（圖）林光宇聽日生日正式退休，預先切蛋糕慶祝。
傳真︰2623-9278
電郵︰