巴塞喺禮拜三作客打和貝迪斯，保持連續十四場西甲不敗，但係教練列卡特就唔開心，因為龍門維迪斯因鹵莽做紅牌阿姑，禮拜日未必可以鬥馬拉加，搞到魯斯度可能又要出動，將列卡特嚇餐飽！
魯斯度季初係咁甩手，令巴塞輸咗一啲無謂波，被打入冷宮，佢每次西甲喺場邊空着急，或者為隊友打氣咁……點知維迪斯禮拜三唔生性，喺禁區推跌敵鋒丹尼，俾球證判十二碼，重趕埋出場。
整咗個「度士」頭嘅魯斯度臨危受命，撲唔到個十二碼冇得講，但佢之後出迎時又甩手，好在有隊友護空門，否則又做罪人！場邊個列卡特睇見就苦笑，好似噏緊阿彌陀佛咁，如果維迪斯打唔甩個紅牌，對馬拉加時列卡特都未必會派魯斯度上陣；話唔定索性用另一後生仔門將佐基拉，至少或者可以減少自己心臟病發嘅機會。
車路士領隊雲尼阿里周三同球會開會討論前途，發現球會仍然有放棄佢嘅意思，即係話歐冠盃打贏阿仙奴入四強，原來對佢來季留隊冇幫助！平心而論，雲尼阿里教波真係有料到，咁耐以嚟一直傳佢季後不獲續約，但依然繼續教好班波；到頭來仍然唔得老細垂青，真係戥佢唔抵！
四月份最新世界足球排名公布，中國係前八十名中升幅最大一隊，由七十六位跳至六十七位，但之前A級賽事對手係香港、科威特。我求大俠覺得中國排名上升只係表面，實力完全無提升過，如果有改善，就唔使日前歐洲集訓第一場友賽，竟然同歐洲魚腩安道爾互無紀錄咁羞家啦！
好多球迷唔明蘇超賽制係點，係十二隊經過三循環共三十三場後，前六名同後六名分開鬥，踢多一個循環即五場，總共踢三十八場；咁做為咗提高賽事水準同增加刺激性，前面爭冠軍同歐洲賽資格，後面就爭護級。若些路迪周日贏基爾馬諾克，就封王，第四循環對佢哋重有乜意義？
𠵱家教緊洪都拉斯國家隊嘅前中國教頭米路天奴域，比洪國足總拖咗佢四個月糧，條數加加埋埋有成十二萬美元（約九十四萬港元）；但係，洪國足總嘅副主席艾保度祖，話會想辦法搞掂佢。唔係我求大俠幸災樂禍，洪國足總明知冇錢，就咪學人充大頭鬼，真係唔衰攞嚟衰。