赤鱲角機場嘅出境大堂，內外都有一間WHSmith，本地人或者遊客出境，唔多唔少都會買啲暢銷小說、《壹週刊》、報紙之類，所以WHSmith生意都唔錯。
呢間公司原來係跨國企業，發迹於英國，專門喺英國及全世界機場開辦書報雜誌零售店，控制咗一個非常龐大嘅書報零售網絡。左丁山唔識做生意，但知道書報零售網，係整個出版界「供應鏈」嘅命脈，WHSmith佔據好多重要機場零售點要津，應該有啲價值。左丁山最近行入機場內嘅WHSmith，心諗如果自己有錢，買咗呢間公司都幾好。
哈，似乎心有靈犀，放完假之後，四月十二日嘅《金融時報》就報道，WHSmith後園失火，英國大本營嘅盈利受壓，一月份發出盈警，現在為咗鞏固大後方，決定出售亞太區（包括澳洲、新西蘭）嘅零售業務。據講亞太區嘅○三年度盈利（截至八月底）達到五百萬英鎊，與○二年差唔多，主要係受到香港、新加坡嘅沙士影響，遊客大幅度減少之故。○三年八月之後，生意已經上揚，照睇今個財政年度嘅盈利會超過五百萬英鎊。
亞太區遊客唔淨只係英語書刊嘅買家，照左丁山睇，呢間公司如果加強中日韓三語嘅報刊書籍，針對區內三大遊客來源，生意重會有進步。如果WHSmith叫價唔太貴嘅話，有得諗噃，香港啲傳媒大亨不妨諗諗佢，搵間投資銀行做顧問，投石問路吖。