𠵱家藝能界已經唔興含羞答答嘅玉女，反而好似韓國嘅全智賢、同埋日本嘅佐藤江梨子，呢類我行我素嘅形象反而好得人心。其實唔單止我羅拉覺得全智賢同江梨子好相似，連佢哋自己都覺得㗎，早排有本雜誌《FRaU》就搵咗全智賢同佐藤對談一番，佢哋即時產生咗「識英雌重英雌」嘅感覺㖭。
雜誌亦都專登解構咗全智賢同江梨子點解可以同樣咁「當灶」，雜誌認為佢兩個一樣係廿二歲咁後生，同樣身高係一點七米嘅「八頭身美女」，而且佢哋都係十幾歲就入藝能界，雖然一個拍水着寫真、一個係雜誌模特兒，但都因為個性夠辣夠野蠻先至能夠出到位，聽落又好似幾有道理喎。
咁啱江梨子最近開始學韓文，所以見全智賢時兩個都特別投契，全智賢重大讚江梨子：「佢係我見過最靚嘅日本藝人！」江梨子就回敬番佢一句：「全智賢頭腦好到簡直令人起雞皮！」咁無厘頭，係你先讚得出！
最近全智賢喺電影《野蠻師姐》入面再顯野蠻本色，原來佢已經唔怕被定型，佢話：「以前就會好驚嘅，不過𠵱家就冇所謂啦，隨便人點講啦！」果然夠cool，野蠻得起喎！