賣樓跟阿仙奴有乜關，睇怕大纜扯唔埋。
一個波，值幾多？如果上面簽滿阿仙奴球員嘅名，咁就唔同。個波好快有得賣。
某慈善團體即將拎出嚟拍賣。亨利、韋拉、雷耶斯、皮利斯、龍格保等，大家熟識嘅天王巨星，簽晒名喺上面，實行賣天價。呢個慈善團體，稍後會宣傳，一眾球迷記住昅實。
個波係由TaylorWoodrow公司，專程從英國帶來，送畀呢個慈善團體拍賣。公司發展倫敦樓盤VizioN7，來港做善事之餘……就係賣樓。
最近特色單位特別搶手，永泰亞洲賣咗年幾嘅九龍塘陶源，「HouseofMonalisa」複式，以二千八百萬賣咗畀個中港廠家，面積二八六八方呎，呎價去到九千七百幾。
蘭西記得，陶源有兩個複式單位，另一個叫「HouseofShakespeare」，喺02年9月剛剛開賣時，意向呎價要一萬蚊，以當時市況，要做到呢個價真係唔容易。
當時有買家出到八千蚊，發展商都唔肯賣。最難得嘅係，發展商咁有耐性同堅持，等咗咁耐，終於搵到肯出呢個價嘅買家，唔知係唔係叫做「守得雲開見月明」呢？
入伙冇耐嘅鰂魚涌逸樺園，有單租客變業主。
美聯物業分行經理鍾漢輝話，個客曾經睇過逸樺園一手單位，唔知自己鍾唔鍾意住，於是以月租萬八，租用二座中層D室，住咗兩三個月，覺得好滿意，於是喺二手市場搵番間，終以四百一十五萬，買入同座低層D室，七九○呎，呎價五二五三，都算係筍價。
住緊嘅單位，就同業主傾賠錢提早退租，相信達成協議成數好大，因為月租每呎二十三蚊，但市值要二十六至二十七蚊。
蘭西
電郵地址：