為咗爭奪政府嘅十億元配對基金，大學校長早排四出揼有錢佬心口。科大喺校內亦發起籌款活動，總共籌得二百萬，原來有一半錢喺嚟自朱校長同朱太陳璞個荷包。
一百萬，億萬富豪打個乞嗤，大約係朱經武四個月人工，真係好偉大。佢噚日出席捐贈者答謝會，唔見佢覺得肉赤，只係話「學校個個都捐啦。」連同外界捐款，科大總共籌到一億三千萬，透過配對基金一對一計劃，成功同政府攞到一億二千七百幾萬蚊。
另外，大陸報章噚日報道，中國電腦一哥聯想集團主席柳傳志，捐出一百萬人民幣，畀中國婦女發展基金會，設立見義勇為人士子女專項基金。
呢筆錢其實來自本港老牌工業家、震雄集團主席蔣震。話說蔣公成立咗一個「蔣震科技成就獎」，表彰推動科技工業有傑出成就嘅人，柳傳志今年初獲選為二○○三年得獎者，獎金為十萬美元。柳傳志大把錢，好慷慨咁拎出該筆獎金，成立上述基金。
傳真︰2623-9278
電郵︰