許志安、林子祥（Lam）、鄭伊健、李克勤、盧巧音、譚俊彥同杜汶澤，噚日喺九龍灣星皓公司為新片《六壯士》開鏡拜神。部戲講阿Lam係波士，周不時糟躓下屬鄭伊健，戲內幾個男人都有啲缺陷，而安仔重因為工作壓力大，搞到不舉㖭。
講到生理問題，安仔講笑話十四歲已經不舉，佢話：「十四歲嗰年讀書時，有次先生問邊個冇做功課，我咪『不舉』囉！其實我生理勝過心理㗎，我連補品都唔使食，睇我個鼻就知啦！啲人話鼻大能力高，其他人我就唔知，不過我都ＯＫ，我老竇個鼻都好大㗎，虎父無犬子嘛！」有傳安仔同鄭秀文復合，但安仔就話：「唔回應，一句講晒，再見亦是朋友。」
另外，克勤今年連接三部電影，佢話𠵱家人人都喺網上下載啲歌，所以唱片賣得少，克勤話：「拍戲收入好啲，以前收到賣碟嘅錢可以買個細單位，𠵱家只係可以買部靚車。」
蔡依林（Jolin）將會喺星期六開演唱會，佢老友蕭亞軒（Elva）噚日就去探班打氣。兩位年輕偶像都走喺時代尖端，行頭自然唔嘢小，噚日Jolin攞住ChristianDior最新款手袋，而Elva就戴Jacob＆Co.名表，Jolin早排公開話想請Elva任嘉賓，噚日見面即刻當面提出，可惜對方話到時要拍廣告，唔知得唔得喎。
許冠傑（阿Sam）將會復出，無綫方面話會幫阿Sam製作個人特輯《歌神再現啟示錄》，會喺五月二號同九號晚播出，屆時阿Sam將暢談今次復出原因，以及近年退休生活。主持會考慮早前為阿Sam新片《滿天神佛頌香江》試觀音造型嘅廖碧兒、胡杏兒、楊思琦同鐘禧文等擔任。
陳奕迅（Eason）早排犯規以廣東話接受有線訪問，無綫考慮到Eason爸爸陳裘大件事對佢打擊好大，同埋相信Eason唔係有心去做，所以決定放佢一馬。Eason前晚出席活動時，亦好識做咁話多謝TVB。不過，關心妍唱片公司高層何家聯就話唔相信無綫有雙重標準，佢話：「陳奕迅冇事，咁關心妍都應該冇事啦！」
無綫噚日又有人事變動，就係助理總經理陳志雲同鄭善強將由噚日開始擢升為總經理（電視廣播業務），以後TVB就會由佢哋兩位董事及集團總經理何定鈞揸大旗。另外，無綫製作部總監汪岐將會喺十月退休，聽講到時佢嘅工作會由陳志雲暫時睇住。至於亞視高層SimonKwan，亦會加盟無綫擔任節目部要職。
