政改嘻哈三人組同阿董嘅政改報告，終於由曾麟詩中嘅阿麟親自飛北京高調交畀中央人民政府主人。點知打開一睇，好似一紮棉花糖，一入口就化，一化就變為空氣，雖然承認○七○八雙選「建議予以修改」，但又列出「九大條件」，頭一條，就係政改「必須聽中央意見」。
如果八方係喬曉陽，就會俾佢吹脹！經過「釋法」，中方嘅「意見」一早經已講到明，就係你特區政府自己打隻實嘅牌出嚟見我。由阿董提交報告，掌控「啟動權」，即是話國家唔想孭鑊，要由阿董亦即曾麟詩嘻哈三人組自己開波，第一隻牌，係東定西，係九萬定一索，由你嚟打，唔係我打。你第一條就話「要聽中央意見」，即是叫我主動教你打隻乜牌，咁就即是繼續強迫中國繼續做醜人，公然違反中英聯合聲明，主動干預高度自治，美國副總統現時在中國訪問，你叫中央人民政府點樣向美方大阿哥交代？請示「中央意見」，咪即是將個波夾硬質番畀中方？咁我中方使乜叫你嚟「啟動」？一早就由喬曉陽講到明喇！
淨係憑第一個「條件」，嘻哈三人組嘅報告，打開個盒，只係見到空氣。可能中方今次真係有揸實當奴隻右手，手把手咁教佢寫乜嘢字，聰明嘅當奴，就喺版功課度，畫一個超巨型嘅問號，然後咬住個鉛筆頭，由大佬阿董交上去，一路偷眼瞄住個阿媽。請問全港教過仔嘅家庭主婦，見到個五歲讀緊幼稚園高班嘅仔，懶得嚟又咁蠱惑，蠱惑得嚟又咁小心翼翼，等待進一步指示，唔知佢真唔識寫，定係一片孝心，你話係咪俾個衰仔激到唔知應該星佢一巴定攬住佢咀兩啖？
九大條件中的所謂符合基本法、考慮市民訴求，全部係「阿媽係女人」式嘅空話。維護行政主導？個特首普選出嚟，市民廣泛認可，自然就有行政主導。至於「檢視有冇政治人才」、考慮市民及政黨「參選成熟程度」，嘻哈三人組似乎唔記得咗死鬼老鄧生前嗰句豪言壯語：「要相信中國人是行的」、「英國人做得到的，中國人也能做得到」（擦鞋仔重加多句：「而且會做得比英國人好」）──咦，好笑嘞，香港嘅中國人，若然唔似英國咁，其實係冇政治人才，參政程度又唔夠成熟，即是智障，咁咪自認係下等民族？唔係「行」，原來係「不行」，曲線侮辱炎黃子孫嘅感情自尊心事小，「港人治港」呢個理念原來根本無法成立，先至事大，若然係咁，就要勞煩中英聯合聲明嘅另一簽署國英國，同埋為全球主持公道嘅美利堅，共同研究吓香港問題，應該點重新解決嘞。
愈釋法，愈冇辦法，愈提交報告，至知原來有好多嘢無可奉告。當奴又話：個報告冇提七一大遊行，因為七一大遊行係為咗反二十三條，與題旨無關。咦，乜啲土共老左唔係堅持話：七一大遊行，絕大多數市民唔係為咗反二十三條而來，而係對社會現狀不滿咩？愈講愈矇查查，究竟邊句至係真？
傳真︰2623-9278
電郵︰