喬李徐中方大騷三人組雖然已經棚尾拉箱返咗北京，但「釋法」大騷當日自由黨只有梁劉柔芬（圖）一人出席，莫非要畀面未來親家曾慶紅？
自由黨中人話，主要原因係大部份議員不在港，當中田少率領咗周梁、劉健儀同楊孝華等多位立法會經濟事務委員會嘅成員，去咗歐洲「考察基建」，上星期五先返嚟，田少後來又再外出公幹，噚晚先返回香港，所以自由黨只有梁劉柔芬一位全國人大出席，一婦當關，論財富，有番咁上下，畀足面祖國有餘。
有好多消息關於周梁田少會唔出直選，據了解，田少每次嘅民調都有兩位數支持度，勝算甚高；至於周梁，就只得單位數支持度，即係冇乜把握，與其打無把握嘅仗，倒不如喺番原來嘅批發及零售界出線，周梁贏梗。
怪不得，民主派嘅線報話喺新東成日見到田少，反而周梁落咗一次區就冇晒影，邊個會直選？商人計數，唔會死錯人。
傳真︰2623-9278
電郵︰