人行兩度提高銀行準備金比率，市場預期宏觀調控或進一步收緊，銀監會更成立調查小組巡查七省五大行業貸款，加上中電信（728）收購母公司資產作價被指偏高，一連串不利消息令到國企股遭拋售，國企指數單日急瀉逾5%。
外圍美股又話驚通脹重燃，息魔重臨，搞到銀行同地產股都被拋售，恒指大跌361點，收報12669。期指加時階段跌幅擴大，最後跌夠487點，收報12605，低水64點，港股後市難樂觀。其實美國經濟都未確認復甦，市場就話驚加息，似乎驚得快咗啲。不過，e莉莎對跌市一啲唔覺驚奇，佢話市場冇消息炒上，大戶自然搵藉口炒落。
華人置業（127）控權股東大劉趁周二股市大漲配股，減持最多2億股，每股作價4.85元，套現近10億元。華置開市無耐已跌破配股價，收報4.75元，大跌13.6%，成交8.2億元。阿虎噚日已見到有1.5億股成交上咗板，以此推算，配售僅完成四分三左右，似乎重有5000萬股等人要，相信股價短期內唔易有作為。
華置同系新股利福（1212）今日上市，剛遇着港股市勢逆轉，招股價8.30元希望能守穩。
雖然外資基金最近入市吸納本港投資物業，例如大摩投得百利保廣場及九龍城廣場，利豐（494）名下嘅沙田利豐中心亦獲外資以2.685億元買入，但這類基金喜歡直接持有物業，未必會流入股票市場吸納收租股。
利福主要經營崇光百貨，大劉在利福上市前減持華置套現，會否另有所圖，就有待觀察。
阿虎