華人置業（127）大股東減持舊股，噚日股價應聲急挫，兼夾跌穿4.85元批股價，收4.75元，急跌13.6%，情況認真慘烈。
有關人等前晚明明講過，批貨由芬佬接咗，因乜原故搞到噚日場面咁悲壯？經紀陳話，皆因好多貨源去咗散戶度，加上噚日大市勁跌361點，所以先至有咁嘅結果。但小初就覺得，有關人士竟然唔出嚟頂吓，售後服務認真麻麻。
與華置有關連嘅利福國際（1212）今日掛牌，雖然同一班搞手堅稱利福有得諗，但經過噚日一役後，唔少投資者捧場時或會有戒心。
在噚日跌市中，經紀黃話其實有唔少股票可以留意，好似剛公布全年業績嘅立信工業（641），雖然股價累積升幅唔細，但仍然有唔少外資大行推介，股價可能高處未算高。
立信全年盈利比舊年上升60.5%，有2.77億元，除咗末期息9仙外，又有特別股息每股7仙。不過，好業績難敵市場壞氣氛，隻股下跌1.3%，收7.55元。
慕容小初