「我最鍾意佢個大屁股」
易服癖Fans變性扮籮霸

籮霸珍妮花洛庇絲（JenniferLopez）呢幾年極速上位，皆因佢嘅外形夠索，無論男男女女都咁受落。最近，美國芝加哥有個二十三歲嘅後生仔米高迪圖（MichaelJTito），亦因為受籮霸影響，搞到佢想做女人，遲吓重會正式做變性手術，成為第二個籮霸㖭。

上電視圓夢
其實米高崇拜籮霸已經去到一個好瘋狂嘅地步，喺好耐以前，佢已經以易服打扮成一個籮霸咁行街。喺八個月前，佢更加定期注射女性荷爾蒙，因為想完成佢扮籮霸嘅夢想，所以參加咗MTV頻道真人騷《IWantaFamousFace》，喺嚟緊幾星期，佢將會喺電視機前接受隆胸、隆面頰、植髮同移眉骨手術，最重要嘅係，佢重會做埋生殖器官手術。
米高話：「J.Lo好靚，佢個大屁股我就最鍾意。而且佢個look夠姣又夠性感，我好想學佢咁着衫。」由於變性手術進行在即，米高已經計劃改名，因為籮霸叫Jennifer，佢會將個名改做Jessica。

撐硬民主黨
另外，籮霸嘅舊愛班亞弗力（BenAffleck），前日去咗民主黨總統候選人克里喺波士頓舉行嘅籌款晚會，號召啲人支持民主黨，認真有心。