打手機都可以打到爆炸，喺呢個誕生七年嘅騎呢特區，重有乜嘢諗唔到嘅事冇可能發生？
人哋手機嘅原產地，係北歐芬蘭。手機隻牌子，叫做Nokia。芬蘭全國人口得嗰四五百萬，佢哋唔炒股，唔炒樓，唔吹水借殼撚財技，憑一隻手機高科技品牌，雄霸全球，國泰民安，呢隻Nokia牌子，梗係信得過。
點知隻手機行銷歐美、非洲、印度，阿差地區，人手一部好好哋哋，一到咗特區，就變咗流動小型炸彈。一經調查，哦，原來部爆炸機，喺鴨寮街買入，經東主證實，係大陸運入嘅劣質水貨。
原來特區有排都未實現為「高科技港」，喺手機方面，一早就超前建成「水貨港」。特區通縮，雙失嚴重，市民慳得就慳，大陸佬自由行攬住百萬人民幣落嚟金舖掃珠寶，就係貪香港啲金器冇花假，啲港人買手機，就最鍾意買珠江三角洲出產嘅冒牌水貨。不止為慳錢，重貪買咗部機返來，可以任由發揮創意，可以隨意改機：例如換機殼，將黑色改為紅黃藍白黑等幼稚園唱遊風格嘅彩色；加閃燈，有鈴聲都未夠威，加一盞大紅燈，喺公眾場合，更引人注意。又或者改鈴聲，將普通嘅鈴聲，改為樂曲或貓叫狗吠，樂曲又有幾千隻任揀，由《何日君再來》至《義勇軍進行曲》，總之火麒麟周身癮，白癡大變身，創意大互動，一機在手，無限騎呢。
不過改呢啲都未必會引起手機爆炸，最大鑊就係改用劣質二三十蚊一隻嘅賤價二手手機冒牌電池。呢隻劣質電池，由於久經叉電，一早叉到殘，因此會隨時電熔，引致線路板啲電線辣着走火，揸部機講緊，同條女貼耳談情，突然爆炸，掟都掟唔切，隨時一邊耳炸甩，嚴重嘅，爆炸力直。
今時今日嘅特區，喺前殖民地政府交收時，司法獨立，領袖英明，本來係一部Nokia原裝名牌手機。點知七年以來，部機落在一個自己冇料、又要爭住當家作主認叻嘅手上，又母乳教學、又中醫中藥港，將個維港，填到鬼五馬六，就係好似一個心智未成熟嘅金毛青少年咁，亂將部手機嚟改裝，鈴聲改為狗吠，原裝機身改為紅黃藍白黑嘅水貨殼，重慌死冇人知自己夠赤化，加盞大紅燈，有事冇事都閃閃吓。
最大鑊嘅就係，正如已故親中律師廖瑤珠警告：中方大舉重用一批政治水貨舊電池，將部手機亂拍亂塞。有啲舊電池，寫到明MadeInChina，叉電叉咗十年八載，本來係廢料，應該倒入堆填區，點知中方就指示我哋阿董，要將啲殘貨當係寶咁拾荒執番。特區七年幾中國人民當家作主，將一部原裝Nokia，來料加工，僭建改裝，本來好好哋哋，終於搞到又「釋法」，又屍爬自由行，劣質電池燒線路板，你好心勸佢咪亂嚟，佢就話你傷害佢民族感情，於是手機爆完一鑊，又炸一鋪，今時今日，搞到鼻崩耳甩，髮燶眼又盲。
全世界嘅諾基亞機主，都要以特區呢個中國普通城市為反面嘅使用手冊，警醒自己：手上有部原裝靚機，唔好手多多亂咁改裝拆嵌，將部名牌瘋狂狎弄。搞到大爆炸，炸死自己事小，累到隔籬嗰個嚇一驚，就無辜喇。
傳真︰2623-9278
電郵︰