八方聽聞，鳳凰衛視中文台台長王紀言最近下命令，攝影師唔可以再拍到「新唐人電視」（有法輪功背景）嘅咪牌，因為廣電局和中宣部長派咗專人負責睇鳳凰台，記錄「新唐人」咪牌出現喺鳳凰台嘅次數同時間，發揮共黨秋後算帳本性，連鳳凰台「甚麼時候，幾分幾秒」映到「新唐人電視」咪牌，計得清清楚楚。然後就致電王紀言，王紀言頂唔住，只好往下層層壓。
其實鳳凰台立場親中「愛國」亦屬國家喉舌，本是同根生，相煎何太急，鬼叫廣電局和中宣部係直接主宰鳳凰落地權嘅部門，為保飯碗，鳳凰台職工只好忍氣吞聲。近日其中一位姓程嘅副台長大發牢騷之餘，居然想出打格仔遮住「新唐人」咪牌，當個咪牌係婦女嘅乳頭一樣，真有創意。
過往鳳凰高層緊張中方，一早都下過指示，凡係民主派人士，例如見到司徒華、李柱銘、楊森同劉慧卿等人參加嘅場合，鏡頭一律要避開，現在連咪牌都要避，真係唔知道應該點採訪，面對一個毫無新聞自由嘅國家，鳳凰都會變山雞。
傳真︰2623-9278
電郵︰