張文光拒絕出席會見喬曉陽，連遊行都冇出現，八方噚日搵到佢老哥，原來呢位二十四孝老竇一早答應個乖乖女，喺復活假一家去美國加州迪士尼樂園玩，所以人大釋法都阻唔到。
張文話自己唔算放得特別多假，只係一出門佢就關機，佢都係返嚟先知道喬曉陽主動要見民主派解畫，唔知有冇芳心如鹿撞，暗歎走寶？「有楊森去就掂。」張文對黨主席可謂信心爆棚，佢話白鴿黨每次做調查都顯示，啲市民既想佢哋要堅持原則，又想佢哋同中方有溝通，所以見係要見，不過一切都係順其自然。
張文個女已經亭亭玉立，去咗英國讀預科，張文都想個女多啲國際視野，加埋跟得貼特區政府嘅教育政策，見過鬼知驚，為免害咗下一代，梗係送個女去英國升大學。
傳真︰2623-9278
電郵︰