林曉峰（阿Lo）日前喺電台公開批評無綫計騷新制，前日阿Lo就俾無綫召咗佢返去照肺，阿Lo重話遲啲會受公司處分㖭。
身為阿Lo好友嘅錢嘉樂同女友李珊珊，前晚喺將軍澳電視廣播城錄影節目《秀出美麗人生2004》，嘉樂仔就力撐阿Lo話：「佢有佢嘅理由，都係想幫有需要嘅人講嘢，我好支持佢，但覺得公司唔應該處分佢，公司係應該令員工有歸屬感，話要零點一咁計騷，唔通人哋又做零點一個表情，我呢番說話唔係針對公司，始終我個女朋友（李珊珊）都係喺公司度搵番嚟，我只希望唔好太大變動，我都對公司有感情。」
轉眼已離開無綫四年嘅李珊珊就話：「呢次第一次入新廠，如果無綫有啱角色搵我拍，都會考慮，但佢哋人才濟濟。」
而N年前幫無綫打工嘅何守信，就力撐無綫咁做好啱，佢重話：「電視台唔係社會福利署，唔係講情，係講利，唔理係阿姐、定係阿妹，都冇情講，商業機構係要睇住盤數，對股東交代。」咁識體諒無綫嘅處境，唔知係咪想𢱑撈呢？
噚日有報道話杜德偉同周汶錡分手後，同陳勳奇個女陳開心拍拖，佢哋重喺手臂紋上同一款嘅「愛的紋身」。不過陳開心噚日同馮仁昭就誓神劈願講：「係就唔怕認，佢咁靚仔，但我發誓真係冇，重話愛的紋身，生死不渝，我未有男朋友㗎，咁講我真係好無辜！」佢又話自己個紋身係去到紋身舖至揀，同杜德偉係完全冇關喎。
演過《鬼王再生》嘅美國女子組合Destiny'sChild成員KellyRowland，噚日喺美國嚟到香港，佢喺機場出閘嗰陣，戴住黑超同着晒成套粉紅色運動裝出現，對記者好友善。
Kelly今次特別應LV嘅邀請出席聽晚舉行嘅紀念活動，到時重會上台表演唱歌。而Kelly亦都好識做，佢喺今次旅程都係用LV嘅行李箱㗎。
劉小慧早排接拍咗「減肥堂」嘅廣告，成功減肥之後，工作接踵而來，又拍廣告，又接登台騷，可以賺外快之餘重可以減肥，小慧就梗係開心啦。小慧重話打算喺暑假期間去沙灘着泳衣㖭，不過，佢就話唯一擔心嘅係驚狗仔隊會嚇親佢嘅屋企人喎！
