大市完成反彈，早已預咗會再試底，但噚日個跌勢，令人心驚，一來跌得急，二來跌幅大，都遠遠超出市場嘅預期，恒指以最低位收市，報12669，大跌361點，而期指重跌得多，收12605，大跌487點，由高水而變為低水64點。
噚日個跌勢完全冇「迫力」，一路直落，形勢都幾險惡。美國或提前加息，成為噚日大市急跌嘅導火線。息口上升，如證明係經濟向好，對股市唔算完全利淡，好多時在加息初期，股市仍會反覆上升，噚日迹近恐慌性拋售，起碼證明一點，投資者對後市冇信心。
國企跌得重「金」，國指4800失守，低收4707，大跌254點，跌幅5.1%，困擾市場嘅仍係收緊銀根、冷卻經濟嘅措施，有人憂慮官府重會有「後着」，但亦有人認為國企暫時都係借勢調整，待衝擊力度淡化後，又會再操上去，國企大部份貨源仍係在基金手上，短線玩波幅，長線仍係要升。
立信工業（641）03年（12月年結）業績增長理想，宣布後有投資者趁好消息出貨，股價由近3個月的高位7.9元回落，噚日收7.55元，跌0.1元，由於業績高增長仍會持續，現價可入市，作中長線持有。
去年集團營業額13.5億元，升18%，獲利2.77億元，升60%，每股盈利49.2仙，末期派息9仙，另特別股息7仙，連同中期之數，全年合共派28仙，往績PE15.3倍，息率3.7厘。
立信係基金股，值得較高PE，現時的15倍屬處於偏低水平，若未來兩年，每年盈利增長仍有30%計，則04年及05年每股盈利可達64仙及83仙，以基金股18倍PE計，今年及明年的股價有機會見11.5元及14.9元。
立信以產銷染整機械為主，並經營不銹鋼貿易和鑄造，中國係最大市場，去年透過有效控制成本及改善營運，錄得毛利5.1億元，毛利率由36%上升到37.7%，與德國機械商成立的共控公司，盈利倍增至5043萬元，而持有30%股權的聯營公司佛山東亞，更由虧轉盈，獲利266萬元。紡織業正進入另一增長期，未來幾年，新染整機械需求上升，集團對前景及維持市場領導者地位充滿信心。
郭兆誠