讀報忽見一則廣告，話赤柱兩個豪宅，以確認人身份出售，標明售價，重講埋上手要完成交易嘅期限。
估計業主想喺到期前，搵到買家承接，否則要畀多至少兩成樓價做首期，兼上會供樓，成本大增。
代理話，呢類擺到明嘅「摸貨」，叫價通常比市價略低，旨在盡快甩身，愈近到期日，愈可以講多啲價。不過，對於有實力嘅業主嚟講，就寧願上會，都唔會畀買家壓價。
據悉，呢兩個豪宅嘅業主，正係呢類有實力嘅投資者俊文珠寶陳氏兄弟相關人士，近兩個月沽出淺水灣蔚峰園，及山頂倚雲山莊，賺咗之後換貨再短炒。兩單位若成功以標價沽出，各賺五百五十萬。
其中富豪海灣B21號屋，最先由名媛鄭明明1月以3800萬買入，唔夠兩個月，由俊文珠寶以3950萬承接，隨即以4500萬放售。真係咁好世界？
科技日新月異，發展商賣樓亦與時並進，利用電腦科技展示樓盤賣點。信和集團為首發展嘅將軍澳蔚藍灣畔，物業仍然喺樓花階段，但就耗資過百萬製作費，製作咗一套立體互動電腦軟件，模擬屋苑十八萬方呎住客會所及各項設施。
發展商噚日喺售樓處做示範，安排大銀幕，介紹呢套立體影片，除咗像真度高之外，重係互動嘅，即係可以用第一身，自行掌控想行走同瀏覽嘅地方，形式類似玩電腦遊戲，透過呢個視像影片，就好似身處個屋苑裏面。
聽發展商講，呢套係全亞洲首個三維圖像立體互動影片，用咗兩個幾月製作，今個禮拜六開放畀睇樓客玩。
唔少酒店都可以月租，馬鞍山海澄軒，佔六成係月租房。
海澄軒副總經理劉啟文話，受惠於CEPA、自由行等，酒店多咗商務租客。
呢班客一般好斯文，又因為係公司客，唔憂冇租交。
酒店梗唔會錯過呢班客，將其中兩層劃作商務層，共十六間房，提供新優惠，商務客租住五間及一年或以上，送五萬蚊月租車位券；個人客戶，租一年或以上，送五千蚊酒店服務。單位月租六千八到兩萬七。
地產代理近年多咗參加專業獎項比賽，好似中原香港商舖部B組高級客戶經理游院玲，及青衣城分行高級客戶經理鄧偉元，齊齊攞到第三十六屆「傑出推銷員獎」。呢個獎由香港管理專業協會舉辦。
中原話，原來佢哋過去十五年，喺呢個比賽中，年年都有攞獎。
另外，同系嘅利嘉閣，都有兩個員工奪獎，係碧瑤灣分行經理招佩貞，同麗城花園三期分行高級客戶經理蔡詠玲。
𠵱家做代理要周身刀，張張利。
華人置業大股東劉氏昆仲——劉鑾雄與劉鑾鴻，近期頻頻見報，不過都係提及點樣搞好間公司，及將私人持有嘅崇光百貨上市等。最新就係私人配售股份，套現逾七億。
華置董事局得兩名執行董事，就係佢哋兩個，咁佢哋收幾多人工呢？啱啱公布嘅華置年報就有得睇嘞，03年及04年一樣收咁多，一個最多係四百五十萬，另一個係一千零五十萬。
照計，收得多啲嗰個，應該係大佬劉鑾雄啩。
蘭西
電郵地址：
