復活節假期，香港人向機場、羅湖「大逃亡」，幾十萬人出外消費，樂壞了航空公司、機管局與旅行社。左丁山亦不甘後人，去咗一處手機冇法子漫遊嘅地方，冇人搵到我，幾盞喎。在酒店嘅電視，收到中天電視（即于品海賣畀台灣辜家嘅衞星電視台），睇到台灣四一○大集會、香港四一一遊行反釋法。咦，咁多中產階級離開咗香港，重有二萬人上街，真係幾有氣勢噃，希望大家將呢股氣勢化為行動力量，就係周圍掹人去登記做選民，策動人人在九月立法會選舉時，齊齊去投票。
離開香港前，收到沙田陳太短訊，佢去完加拿大返嚟，又去東馬來西亞，玩餐飽；惡佬明全家去西馬，唔執輸。小YY自倫敦來短訊話倫敦驚住恐怖分子作怪，非常緊張，連續兩日坐地鐵都有阻滯，因警察要搜查而引致部份路線停開也。到咗耶穌受難日，佢晨早去到機場乘機去德國，點知火警鐘大鳴，保安猛叫人疏散，但向邊個方向走、走去邊？保安人員都唔知，人人矇查查，盲舂舂走咗一輪，機場宣布係falsealarm，警鐘誤鳴啫，於是大家呻氣兼舒一口氣。小YY話：「如果真係有恐怖襲擊，都唔知點辦！」
連中國人（又係福建人）都可以俾伊拉克唔知乜派綁架，雖然好快就放番，但證明呢個世界實在好混亂，無一處是安樂土，但我哋又無可奈何，只能念一句：「阿彌陀佛！」