成個亞太區，冇邊個股市跌得好似港股咁淒涼。恒指唔見2.8%，國企指更加唔見5.1%。香港收市後，倫敦港股即時彈番95點，相當於港市跌幅收窄四分一。倫敦港股指數參考價值唔大，點都要睇埋美股點走。美股因為經濟數據靚驚提前加息而散落嚟，跌勢未必會持續。經濟好，一樣可以拉動股市向上。
33隻恒指成份股一片紅，冇隻升。中遠（1199）跌得最少，收12.60元，微跌10仙，但隻Call輪9203則大散23%，收1.44元。隻輪下月底夠鐘，負溢價2.2%，槓桿率8.8倍。睇數據，好似好抵買，不過正股價高，距高位唔遠，恐怕冇乜水位，中遠Call輪吸引力唔係咁大。
對恒指拖累最大嘅係滙控（005），其次係中移動（941）。中移動收22.70元，散1.05元，恒指為此而跌67點。中移動上月最低22.05元，若然今回跌近呢個低位，博下試低位成功，諗些少中移動Call輪博反彈，對象係9342，6月到期，溢價6.4%，槓桿率19.7倍，留意壽命唔係太長，日子拖吓拖吓啲溢價會愈縮愈小，做嘢嘅話記得快手快腳。
新地（016）收73.75元，散2.75元。博反彈揀輪，對象係Call輪9511，7月夠鐘，輪價58仙，溢價5.5%，槓桿率12.7倍。
章盛