喬曉陽三人組來港，曾梁兩司長日陪夜陪，獨不見唐司長，查問之下，先知唐唐一早請假，四月三日已經閃咗不在港，直至噚日假期完畢，由歐洲某處直飛去德國法蘭克福，同特區官員會合後，展開佢為期四日嘅訪歐行程。
唐唐今日會同歐洲中央銀行總裁同當地金融機構嘅高層見面，之後就轉去巴塞爾，周四為「巴塞爾世界鐘表及珠寶展覽會」嘅新館同「香港館」主持開幕禮，重會發表演說，嘩，歐洲嗰邊，巨星熠熠，一拍埋，邊個場面更加重要，留學過美國嘅唐唐，一定識選擇。
記得舊年此時香港沙士肆虐，瑞士政府突然頒布限制令，毫不理會中國人民感情，唔畀本港廠家同遊客參加或者參觀展覽，搞到當時做緊工商及科技局局長嘅唐唐，向瑞士佬發出憤怒同遺憾聲明，瑞士當然唔理你，事隔一年，唐唐升做財司，今次親自帶隊，都算阿Q式威番次。
唐唐放假加外訪，由鬍鬚仔曾俊華署理財司，直至十七日唐唐返嚟為止。
傳真︰2623-9278
電郵︰