伊拉克愛國游擊隊經我國政府透過友好渠道溝通，終於發現綁錯好人，毅然改正錯誤，將我方七名勞工釋放。國家顯示綜合國力，能人所不能，正如毛主席教導：「誰是我們的朋友，誰是我們的敵人？這個問題是革命的首要問題」，祖國支持侯賽因，擁護拉登，若然咁都受到伊拉克愛國游擊隊懲罰，試問點樣教導下一代，乜嘢叫啱，乜嘢叫錯。
今次得到真神阿拉及鄧公在天之靈聯合保佑，兼伊拉克臨時管治委員會根據鄧小平原意，尋求可蘭經釋法，終於擺平一宗糾紛，呢七名福建勞工雖食豆食着屎，直頭可以提名競選諾貝爾和平獎。
特區呢一邊，就依然亂過巴格達。特首阿董及政制搞笑三人組民望齊齊下跌。阿董民望跌，經已唔係新聞，最可惜嘅就係聲稱「流香港血、飲香港水」嘅當奴。
不過唔怕，AO小圈子耳語：當奴份人好清醒，佢極為重視個人嘅清譽，唔會任由自己民望下跌。今次佢搶閘在中方釋法之前，先飛身肯定「○七○八選舉有必要修改」，搞到啲土共社團，事後狂補飛，猛喺親中報章登廣告話反對○七○八政制變動，都係浪費廣告開支兼報紙紙張油墨，呢一招搶先洞房搞大肚，好似牧牛童咁，一吓快手扯住隻儍牛個鼻環，拉佢去咗自己想去嘅嗰邊，當奴不愧官場老手，呢嘢盡顯政治智慧。
若然中方唔老厲，則當奴進可攻，退亦可守，一招稱病告假，個工作報告，高調交畀林公公同詩姑搞掂，做個人工流產手術，將個死胎鉗出來，嗰浸胎衣，重可以用來煲湯。當奴效法當年衞奕信扑瓜八八直選咁，自己攝位欺身貼住閃開，將來香港史上秦檜污名，絕對唔使由阿當奴來孭。
不過，算盤可以咁打，唔知大陸佬會唔會任由我哋當奴上下其手，摸身摸勢？政府小小家家，竟然發表新聞稿，話中央政策組委託出面調查，四一一遊行得嗰七千六百二十七人，手舞足蹈，歡喜之情溢於言表，呢啲咁細路哥脾氣嘅小動作，絕對唔似當奴所為。一個咁幼稚嘅政府，點樣領導香港人過呢一關？
都係伊拉克嗰七個福建盲流最有智慧，執番條命之後，以無比勇氣，居然話想留喺伊拉克繼續打工。寧願留喺炮火連天嘅巴格達，都唔肯返「以民為本」嘅大陸，一定係睇好美國長遠會成功扶植親美政權，到時伊拉克變為美國第五十一州，成為自由民主國家，七名民工再歸化入籍，子孫做埋外圍美國人，不讓鄧小平個孫等中國高幹仔女壟斷晒啲美籍華人護照quota。
香港咁多人失業，拜託福建七壯士，同香港啲毅進展翅呀咁成班學員喺嗰頭搵吓有冇工，等到阿鸚哥一做特首，唔止何鴻燊帶頭移民，雲大棉踩住雪屐走，中東沙塵滾滾，有條退路，有福建七雄為鑑，做咗人質，都會嗱嗱聲放，香港打工仔更加信賴強大嘅祖國，原來梁錦松當日講嘅魚塘，就係巴格達呢個擔泥紮鐵嘅建造業自由行天堂？
傳真︰2623-9278
電郵︰