喬曉陽、李飛同徐澤真係疼愛老董，星期二喺北京人大常委一釋完法，星期三就嚟到香港大搞統戰新攻勢。
咁唔知係中方一向無神論，唔承認耶穌復活節假期，定係共產黨不改「以我為主」本性，唔理你香港人放假，一於照飛嚟「釋法」，結果上周四喺展貿中心個座談會，除咗台上煲呔、詩姐姐同林D9之外，司局級台下只有一個何志平局長出現，議員都嚟唔齊。
林瑞麟辦公室話的確只有一個局長到，因為佢哋第二日喺禮賓府有得見。
不過據八方四周打聽，原來嗰幾日剛好係清明復活長假期前後，好多司局長放假不在港或者未返到，包括唐唐、馬亨、廖冬冬同王永平，而葉澍堃就去咗科威特簽航空協議；至於喺香港嘅鬍鬚孫、曾俊華同李國章成班，就因有事忙或者要開會，唔理喬曉陽。
座談會兩日前先通知，又喺九龍灣咁遠，叫人點樣「愛國」？況且單嘢係煲呔三人組嘅事，其他高官睬佢都儍。
（圖）上周四釋法座談會，台下司局級得何志平一個到。
傳真︰2623-9278
電郵︰