陶喆向來畀人好專一嘅感覺，除咗之前嘅女朋友Melody外，佢嘅感情生活都好神秘。早排陶喆俾記者見到同個女仔出席家庭聚會，傳聞呢個新女友就係見過報嘅Joanna。
噚日陶喆嘅爸爸陶大偉喺台灣為國際動畫影展做代言人，佢冇證實嗰個女仔係咪Joanna，不過佢就話之前見過呢個女仔，重話陶喆身邊有好多女性朋友，個仔去到唔同嘅地方，就有唔同嘅女仔。
陶大偉重踢爆陶喆入行之前有好多女朋友，Melody只係其中一個，佢重話自己都係過來人，如果個仔得一個女朋友，自己反而會擔心，佢希望陶喆可以識多幾個，睇多幾個，自己唔會急於想個仔結婚同生仔。估唔到陶喆嘅爸爸思想咁開通，咁陶喆咪攞正牌去識女仔？不過陶爸爸咁講，唔知會唔會嚇親Joanna呢？
利嘉兒同周國豐被踢爆拍拖，噚日佢哋喺唔同嘅電台出現時，不但春風滿面，重隔空勁讚對方。利嘉兒話男友周國豐好溫柔同穩重、又識體貼自己，至於周國豐就不避嫌話視利嘉兒為結婚對象，不過佢就坦白咁話介意女友以三點式示人，重會力勸女友唔好加入樂壇，費事搞到自己身份尷尬。唔知利嘉兒會唔會為愛情犧牲呢？
樂壇新人薛凱琪噚日去商台接受訪問，對於新碟反應良好，佢話若果銷量去到二萬五，公司就會幫佢舉行慶功宴。薛凱琪又話即將拍寫真集，問佢會唔會着泳裝拍攝，佢就即刻耍手擰頭，好抗拒咁，其實拍寫真着泳衣都好平常啫。
王菲緋聞男友李亞鵬上星期四晚喺內地拍王晶同程小東嘅劇集《天下第一》，拍攝李亞鵬由高處跳下，但佢跳到第三次，就跌咗落地，重整傷右腳韌帶，助手即刻孭李亞鵬返酒店，當晚佢只係用冰敷住，第二日先至睇醫生。𠵱家劇組要跳拍其他人嘅戲份先，因為李亞鵬聽日要開刀，不過劇組話暫時唔會考慮換人，咁都好啲。
汪明荃（阿姐）噚日以「樂施大使」身份出發去貴州，探訪當地貧民。原來佢今次第二次去貴州，阿姐話：「貴州係貧困地方，可以用『天無三日晴，地無三呎平』嚟形容，我今次會順便訪問吓農民，睇吓佢哋有乜嘢需要，希望幫佢哋爭取。」馮仁昭都希望阿姐幫到有需要嘅人！
