利物浦前晚喺聯賽輸畀查爾頓，令得英超聯第四位之爭更趨激烈；事關目前連第十位嘅富咸，都只係相差第四位利物浦五分，競爭激烈程度媲美爭聯賽冠軍。
加埋第十一位以後多支球隊，目前仍有降班危機，睇嚟今季賽事有別以往，除咗阿仙奴同狼隊或者可以喺一、兩場之後變成「例行公事」外，其餘十八支球隊都可能要拼搏到最後一場至得，球迷就有福囉！
另外，由於排第九名嘅米杜士堡，都只係相差第四位四分，如果「米堡」真係踢到歐冠盃，保頓就可以憑聯賽盃亞軍踢足協盃，咁往後保頓對住其他爭第四位球隊，肯定又多兩錢肉緊幫「米堡」開路！
諾域治喺前晚場英甲能作客贏雷丁，全靠球證巴利幫手。話說雷丁後衞哥頓嘅頭槌解圍，省中巴利個身再彈落諾域治中場梅利隻腳，梅利一聲唔該就送個波入網；而諾域治贏波後，藉西布朗失分做榜首。雖則球證喺場上係死物，但巴利啲位置感差成咁，真係有檢討必要。
英國傳媒日前話巴塞隆拿有可能將「細哨」朗拿甸奴以五千萬鎊賣畀車路士，並喺曼聯挖雲尼斯達羅頂「細哨」。雖則「細哨」對巴塞好重要，但佢哋𠵱家莫財，連當日買細哨嚿錢都係主席拉樸達出住先；而車仔老細阿巴莫域治買球員一向唔問價，所以呢單交易真係有可能發生。
呢排英超「紅人」要數富咸前鋒C約翰莫屬，復活節賽期兩場比賽共入四球，睇睇吓佢個樣重有啲似已離隊嘅沙夏，即管睇下C約翰可唔可以打破今季多位新人，例如熱刺迪科、車路士梅度、狼隊艾法臣、樸茨茅夫摩拿等，加盟球會後只係頭幾場有表現嘅宿命嘞！
前日湖人主場對帝王慘敗後，被指不滿俾隊友同教練批評，而故意留力嘅拜恩成為眾矢之的。佢堅持自己失準係因為帝王防守好，但係明眼人一睇就知佢喺上半場只係起手一次，根本就唔想攞分。最唔啱係拜恩竟然揀季尾最關鍵嘅時候嚟鬥氣，唔怪得佢的隊友咁鬼㷫喇！